फिचर, समाचार » नेपाल-भारत सम्बन्धबारे स्वामी महामण्डलेश्वरको अनौठो वाणी, मोदी किन रिसाए ?

पोखरा, २७ चैत । विश्वविख्यात परमहंश स्वामी महेश्वरानन्द महामण्डलेश्वरले दुई कानबीच मगज नहुनुले मात्रै नेपालीलाई गरिब भन्ने गरेको बताउनुभएको छ ।
अमेरिकालगायत विश्वका विभिन्न देशमा आफ्नो अध्यात्मिक प्रवचन तथा योगको माध्यमबाट हजारौंलाई दीक्षित गरेका स्वामीले नेपाल भारतको पनि शीर भएकोले भारतीयले नेपाललाई सम्मान गर्नुपर्ने बताउनुभयो ।
भारतको मध्यप्रदेशको उचियानीमा आउँदो अप्रिल १२ तारिख (मंगलबार)देखि सुरु हुने कुम्भ मेलामा भाग लिन जाने क्रममा आरामको लागि पोखरा आएका स्वामीले शुक्रबार सञ्चारकर्मीसँग संक्षिप्त कुराकानी गर्दै भारतीय प्रधानमन्त्री नरेन्द्र मोदीका कारण नेपाल भारत सम्बन्ध केही बिग्रिए पनि यो छिट्टै सङ्लिने आशा व्यक्त गर्नुभयो ।

भारतीय प्रधानमन्त्री नरेन्द्र मोदी आफ्नो पहिलो नेपाल भ्रमणको क्रममा राजनीतिक मिसन पूरा गर्न जनकपुर जान चाँहेपनि त्यो सम्भव नभएपछि बिच्किएको उहाँको भनाई थियो । उहाँका अनुसार विहारको आसन्न चुनावलाई मध्यनजर राख्दै मोदीले जनकपुरको धार्मिक यात्रा गर्न खोज्नुभएको थियो । ‘त्यो समय उनी नयाँ दुलाहा (प्रधानमन्त्री) थिए, दोस्रो पटक पनि जनकपुर जान नपाएपछि उनी रिसाए, राजनीतिज्ञहरु आफ्नो हितको लागि केही न केही गर्छन्, त्यो बुझ्नुपर्छ,’ उहाँले भन्नुभयो । स्मरण होस् भारतीय प्रधानमन्त्री मोदीको प्रतिष्ठासँग जोडिएको विहार निर्वाचनमा भारतीय जनता पार्टी बढारिएको थियो ।
नेपाल हिन्दू राज्य होस् भन्ने भारतीय प्रधानमन्त्री मोदी र अन्य भारतीयहरुको समेत चाहना रहेको स्वामीले खुलासा गर्नुभयो ।
आफूले भूकम्पमा राजस्थान सरकारमार्फत सहयोग गरेको स्मरण गर्दै उहाँले पोखराको पर्यटन प्रवर्द्धनका आफूले सक्दो प्रयास गर्ने आश्वासन दिनुभयो । पोखरा बसाईका क्रममा स्वामीले आइतबार र सोमबार प्रवचन दिनुहुनेछ ।
dainiknepal