दुई खेलमा १७ गोल
सहिद स्मारक 'ए' डिभिजन लिगको पछिल्ला तीन सिजनमा रेलिगेसन टार्न पनि 'घुमाउरो बाटो' प्रयोग गरेको आरोप खेप्दै आएको एपीएफले मोफसलको 'बी' डिभिजन लिग च्याम्पियन देशभक्त युवा क्लबलाई १०-१ ले निराश पार्यो । सशस्त्र प्रहरी बलले वि.सं.२०६१ मा स्थापना गरेयता एपीएफ क्लबले हात पारेको सबैभन्दा ठूलो अन्तरको जित यही हो ।
एपीएफले थप गोलका दर्जन अवसर उपयोग गर्न सकेन । त्यसैले लक्ष्मी हुन्डाई मनाङ-मस्र्याङ्दीले टुसालमाथि रचेको १२-० को अन्तरलाई एपीएफले उछिन्न्न सकेन । दोस्रो खेलमा लिग च्याम्पियन लक्ष्मी बैंक थ्री-स्टारले म्याकड्वेल्स आरसीटीलाई ५-१ ले पन्छायो । नयाँ सिजनकै पहिलो प्रतियोगिता गोर्खा कपको १२ खेलमा प्रतिखेल ५ गोलको औसतमा कुल ६० गोल भए ।
लगातार दोस्रो जितपछि थ्री-स्टार समूह 'बी' मा ६ अंक जोड्दै नकआउट प्रवेशको संघारमा पुगेको छ । पहिलो खेलमा एपीएफलाई २-१ ले हराएको आरसीटीको ३ अंक छ । नवलपरासीको देशभक्तविरुद्ध प्राप्त जितसँगै एपीएफले पनि ३ अंक जोड्यो । दुवै खेल हारेपछि देशभक्त शून्यमा छ । समूहको अन्तिम चरणमा थ्री-स्टारले एपीएफ र आरसीटीले देशभक्तविरुद्ध खेल्नेछन् । त्यही खेलले अन्तिम आठ प्रवेश गर्ने दुई टिमको टुंगो लाग्नेछ ।
प्रकाश बुढाथोकीले प्रहार गरेको बलमा आरसीटीका निरज रेमी मगरले आत्मघाती गोल गरेपछि थ्री-स्टारले छैटौं मिनेटमै गोलको खाता खोल्यो । उसको अग्रता लामो समय टिकेन । थ्री-स्टारका रक्षापंक्तिको गल्तीको फाइदा लिंदै सुमन लामाले गोल गर्दै आरसीटीलाई २० औं मिनेटमै १-१ मा पुर्याए ।
प्रकाशको प्रहारमा पोलमा लागेर फर्केको बललाई कप्तान सन्तोष साहुखलले नजिकबाट पोस्टको दिशा दिंदै थ्री-स्टारलाई २-१ को अग्रता दिलाए । त्यसपछि थ्री-स्टार रोकिएन । स्टारहरूले भरिएको उसले विराज महर्जनको लोभलाग्दो गोलसँगै ३० औं मिनेटमा ३-१ को अग्रता लियो । पेनाल्टी क्षेत्र ठीक बाहिरबाट विराजले बायाँ खुट्टाले प्रहार गरेको बल सुन्दर गोलमा रूपान्तर भएको थियो ।
'खेलअघि तिमी -विराज) गोल गर्न सक्छौं भनेर एसएमएस पठाएको थिएँ । उनले मेरो निम्ति गोल गर्ने जवाफ दिए । उनले त्यो वाचा पूरा गरेकामा निकै खुसी लागेको छ,' थ्री-स्टार प्रशिक्षक प्रदीप हुमागाईंले भने । जगजित श्रेष्ठले ५० र जिका डोडोजले ६४ औं मिनेटमा गरेका गोल पनि स्तरीय थिए ।
थ्री-स्टार कप्तान सन्तोष ६१ औं मिनेटमा पाएको पेनाल्टीमा असफल भए । पेनाल्टीमा उनले प्रहार गरेको बल क्रसबारमा लागेर फर्कियो । उनले त्यही रिबाउन्ड बललाई पोस्टको दिशा दिए । उनी त्यसअघि नै पेनाल्टीमा विपक्षीले नछोई फर्केको बल आफैंले लिंदा अफसाइड हुने नियममा चुकिसकेका थिए । विराजको क्रसमा आरसीटीका डिफेन्डर कृष्ण कुँवरले हातले बल रोकेपछि थ्री-स्टारले पेनाल्टी अवसर पाएको थियो ।
'सबै गोल स्तरीय भएकाले सन्तुष्ट छौं,' थ्री-स्टार प्रशिक्षक हुमागाईंले भने । आरसीटी प्रशिक्षक मधु कार्कीले भने, 'थ्री-स्टार धेरै राम्रो टिम हो । हाम्रो डिफेन्स धेरै कमजोर छ । आसलाग्दो टिम नभए पनि क्वाटरफाइनल पुग्ने आस छ ।'
राजेन्द्रको चार गोल एपीएफका मिडफिल्डर राजेन्द्र रावलले देशभक्तविरुद्ध चार गोल गरे । उनले १४ औं मिनेटमा गोलको खाता खोलेपछि दोस्रो गोल २६ औं मिनेटमा गरे । देशभक्तका अजय पौडेलले एपीएफका जाङ्बु शेर्पालाई फल खेलेपछि प्राप्त पेनाल्टीमा गोल गर्दै राजेन्द्रले ४३ औं मिनेटमा ह्याटि्रक पूरा गरे ।
पहिलो हाफमा ४-० को अग्रता लिएको एपीएफका लागि सुदीप सिख्राकरले ३२ औं मिनेटमा गोल गरे । नवीन लामा, जाङ्बु, विशाल श्रेष्ठ र गणेश लावतीको नाममा एक-एक गोल रह्यो । देशभक्तका अजय पौडेलका निम्ति सुखद रहेन । उनले गणेशले प्रहार गरेको बल रोक्ने प्रयासमा ५८ औं मिनेटमा आत्मघाती गोल गरे ।