एकपछि अर्को झडपले गोरखा तनाबग्रस्त
शनिबार राती गोरखाको दुई ठाउँमा झडप भयो। गोनपा १० स्थित स्याउलीका सम्भु पन्तलाई मोटरसाइकलले ठक्कर दिएपछि घटनाले उग्र रुप लियो। जिप्रका गोरखाका प्रहरी निरीक्षक रामचन्द्र पौडेलले प्रहरी सञ्चार सेटमार्फत् दिएको गतल निर्देशनलले घटनाले उग्र रुप लिएको हो।
आँबुखैरेनीदेखि गोरखाबजार आउँदै गरेका दुई प्रहरीहरु पनि घाइते भए। ट्राफिक इञ्चार्ज प्रबीन आचार्य र प्रहरी जवान करुण श्रेष्ठलाई आक्रोशित स्याउलीका युवाहरुले कुटपिट गरेको प्रहरीको दावी छ। कुटपिटमा तरुण दल अध्यक्ष ध्रुब पन्तपनि संलग्न रहेको प्रहरीको भनाइ छ।
घटना साम्य पार्न प्रहरीले कांग्रेस नगरसभापति राजनराज पन्तलाई टेलिफोन गरी शनिबार बेलुकी अबेर जिप्रका बोलाएको स्रोतको भनाइ छ। प्रहरी निरीक्षक रामचन्द्र पौडेलको कार्यकक्षमा तरुण अध्यक्ष पन्तले स्याउलीमा प्रहरीहरुलाई कुटपिट गरेकोबारे नगरसभापतिलाई जानकारी गराएका थिए। छलफलमा टेबुक ठोकाठोक भएको स्रोतको दाबी छ। छलफलपछि नगरसभापति पन्त जिप्रकाबाहिर निस्किए।
यता प्रहरीले बजारमा बस्ने 'प्रबीन' नाउँ गरेका युवाहरुलाई खोजी गर्न थाल्यो। 'प्रबीन' नाउँ गरेको युवाले चलाएको मोटरसाइकलले सम्भूलाई ठक्कर दिएको गतल सूचना प्रहरीमाझ फैलिएपछि एकपछि अर्को प्रबीनलाई प्रहरीले जिप्रका झिकाएको हो। चाइनीजधाराका प्रबीन बोगटीलाई बिना कारण प्रहरीले जिप्रका झिकाएको भन्दै युर्थफोर्स अध्यक्ष बसन्त गुरुङ्ग सहित महिला समूह जिप्रका आए।
प्रहरीबिरुद्ध नाराबाजी गरे। मूलगेटमा ताल हानेको र जताभावी बोलेको बताइएको छ। केही समयपछि प्रहरीले सम्भू पन्तलाई ठक्कर दिने मोटरसाइकल र चालकलाई नियन्त्रणमा लियो। बा ५५ प ५७२५ नम्बरको मोटरसाइकल र चालक गोनपा ८ का गोकर्ण बुढाथोकीलाई प्रहरीले नियन्त्रणमा लिएको जनाएको छ।
घाइते नगरसभापति पन्तको प्राथमिक उपचार गोरखा अस्पतालमा भयो। ढुङ्गा प्रहारबाट घाइते भएका पन्त करीब १५ मिनेट बेहोस भएका थिए। पन्तको थप उपचार काठमाण्डौस्थित टिचिङ्ग अस्पतालमा भएको बताइएको छ।
यो घटनाको समाधान निकाल्न नसकेको गोरखाको प्रहरीलाई फेरि अर्को तनाब थपिएको छ। पोखराथोकका युवाहरुले दरबारमार्गस्थित एक क्रियापूत्रीलाई शनिबार राती आक्रमण गर्न खोजेको भन्दै त्यसक्षेत्रमा शनिबार रातीदेखि तनाब बढेको छ। आइतबार दुवैतर्फका ब्यक्तिहरुले एकअर्काबिरुद्ध जिप्रकामा किटानी जाहेरीसहित मुद्दा दर्ता गर्न खोजे। प्रहरीले दुवैतर्फको मुद्दा दर्ता नगरेको बताइएको छ।
पोखराथोकका युवाहरुको समूह जिप्रका, जिल्ला प्रशासन, हरमटारी चोकमा दिनभरजस्तो देखिएका थिए। यसैक्रममाः पोखराथोक समूहका गोनपा १ का बिनोद कोइरालालाई हरमटारीचोकमा करीब पाँच जनाको समूहले आक्रमण गर्यो।
हेल्मेट, ढुङ्गाले कोइरालालाई प्रहरीकै बिट अगाडी आक्रमण भएको पोखराथोक समूहले जनाएको छ। दिनदाहाडै कोइरालालाई कुट्ने अपराधिलाई प्रहरीले देख्दादेख्दै संरक्षण गरेको भन्दै पोखराथोक समूहका युवाहरु, स्थानीय, एकीकृत माओबादी, नेकपा–माओबादी लगायत दलले बन्द आब्हान गरे।
बन्दलाई एमाओबादीका बिष्णु भट्ट, लेखबहादुर थापा लगायतले सम्बोधन गरे। उनीहरुले …कांग्रेसका गुण्डाहरुले दिनदहाडै आक्रमण गरेको' भन्दै बिरोध गरे। टायर बाले। सडकमा लाठा बोकेर बन्द आब्हान गरेकाहरु र दिनदहाँडै प्रहरीकै अगाडी कोइरालालाई आक्रमण गर्नेलाई पहिचान गर्न गोरखाको प्रहरीले सकेको छैन। हरमटारी चोकमा खटिएका प्रहरीले कोइरालालाई आक्रमण गर्दा समेत टुलुटुलु हेरिरहेका थिए। थप सुरक्षा फोर्स मगाउन उनी जिप्रकातर्फ दौडेका प्रत्यक्षदर्शीले बताएका छन्। जिल्लामा एकपछि अर्को गरी आपराधिक घटना बढ्दै गएको छ। डीएस्पी रमेश थापा उत्तरी गोरखाको भ्रमणमा निस्केपछि नै जिल्लाको बिभिन्न ठाउँमा झडप र आपराधिक घटना हुने क्रमः बढेको छ।
घटना साम्य पार्नका लागि क्षेत्रीय प्रहरी कार्यालयबाट एसएसपी केदारमानसिंङ भण्डारीको टोली आइतबार गोरखा आएका बताइएको छ। भण्डारी, सीडीओ बेदप्रसाद खरेल लगायत टोलीले आइतबार दिनभर जिल्लाको सुरक्षाअबस्थाबारे जिल्ला प्रशासन कार्यालयमा एकपछि अर्को बैठक गरे। उनीहरुले कांग्रेस, एमाले लगायत दलका जिल्लास्तरीय नेतृत्वसँग छलफल गरेका थिए।
सीडीओ खरेललाई जिल्लाको सुरक्षा अवस्थाबारे आइतबार साँझ पौने आठ बजेतिर पटक–पटक उनको टेलिफोनमा सम्पर्क गर्दा उनी सम्पर्कमा आउन चाहेनन्।