पेपेको राँगो पाराले यसरी खाए रातो कार्ड (भिडियो सहित)
प्रतिस्पर्धात्मक हुने अपेक्षा गरिएको पोर्चुगल र जर्मनीबीचको खेल लास्टमा CR7 (७ नम्बरको जर्सी लगाउने क्रिस्टियानो रोनाल्डो) नेतृत्वको टिमको लज्जास्पद हारमा टुङ्गियो। स्टारहरु चम्किरहेको यस पटकको विश्वकपमा स्विडेनविरुद्धको खेलमा शानदार ह्याट्रिक गरी विश्वकपमा छनौट गराउने वर्ल्ड फुटबलर अफ दि इयर रोनाल्डोको जादू हेर्न पाउने अपेक्षा धेरैको थियो। ह्याट्रिक त भयो तर CR7 ले हैन विपक्षी जर्मनीका थोमस मुलरको नाममा। पोर्चुगल र उसका फ्यानहरुका लागि बिर्सन लायक नै रह्यो खेल।
पेपेको राँगो पारा
पेनाल्टीबाट एक गोल र Mats Hummels ले अर्को एक गोल थपी पोर्चुगल ०-२ ले पछि परेको पाँच मिनेटमै ब्राजिलमा जन्मिएर पोर्चुगलबाट खेल्ने पेपेले सन्तुलन गुमाए।
बल नियन्त्रणमा लिन खोसाखोस भइरहेको थियो जर्मनीका मुलर र पेपेबीच। त्यता केही भएछ। विवादलाई यत्तिकै नछाडेर पेपेले मैदानमा रहेका मुलरलाई राँगोले हानेजस्तै टाउकोले टाउकोमा हिंसात्मक तरिकाले हाने। यो व्यवहारपछि उनलाई रातो कार्ड दिनुबाहेक अरु विकल्प थिएन।
रातो कार्डले दिने एक खेलको प्रतिबन्ध बाहेक शायद् फिफाले यो हिंसात्मक व्यवहारको लागि थप दण्ड पनि दिन्छ होला। बिचरा पेपेको विश्वकप यात्रा यत्तिमै अन्त्य हुनसक्छ।
यद्यपि मुलर प्रति पनि औँला नउठेका हैनन्। पेपेको गल्ती त आफ्नो ठाउँमा छँदैछ। त्यसका लागि रातो कार्ड दिनुपर्नेमा त विवादै छैन। तर पेपेले छुस्स छुँदा मात्र पनि के के न भएको जस्तो गरेर ढलेको र त्यसैबाट उत्तेजित भएर पेपेले त्यस्तो आपत्तिजनक व्यवहार देखाएको भन्ने कमेन्ट्री पनि अन्तर्राष्ट्रिय मिडियामा देखियो।
तर मुलर यो विश्वकपमा पहिलो ह्याट्रिक गर्ने खेलाडी बने। स्वभाविक रुपमा म्यान अफ दि म्याच पनि उनै भए।
रातो कार्डको प्रतिक्रियामा पोर्चुगलका खेलाडी Raul Meireles को प्रतिक्रिया पनि गतिलो थिएन-
१० खेलाडीमा सीमित पोर्चुगल त्यसपछि दुई गोल खायो र खेलमा 0-४ गोलले पराजित हुन पुग्यो।
अनि यसरी रुनु पर्यो CS7
अमेरिकाको रेकर्ड
गएरातिको खेलमा अमेरिकाले पनि रेकर्ड राख्यो। खेल सुरु भएको ३२ सेकेन्डमै घानाविरुद्ध गरेको गोल विश्वकपको इतिहासमै सबैभन्दा छिटो भएका गोलमध्ये एक थियो। रेकर्डको पाना पल्टाएर हेर्दा सबभन्दा छिटो गोल टर्कीका Hakan Suker ले ११ सेकेन्डमा गरेको गोल छ (२००२ मा दक्षिण कोरियाविरुद्ध), १६ सेकेन्डमा चेकोस्लोभाकियाका Vaclav Masek ले गरेको गोल (१९६२ मेक्सिकोविरुद्ध) दोस्रोमा र २५ सेकेन्डमा जर्मनीका Ernst Lehner ले १९३४ मा गरेको अस्ट्रियाविरुद्धको गोल तेस्रोमा र फ्रान्सविरुद्ध १९८२ मा २७ सेकेन्डमा इङ्ग्ल्यान्डका ब्रायन रोब्सनले गरेको गोल चौथो छिटो नम्बरमा थियो।
विश्वकपमा भएका अमेरिकी गोलमध्ये त सबैभन्दा छिटोको रेकर्ड नै बन्यो। ८२ औँ मिनेटमा घानाले गोल नगरेसम्म अमेरिकी अग्रता कायमै थियो। तर ८६ औँ मिनेटमा भएको अर्को गोलले अमेरिकालाई खेलमा विजयी बनायो।
एसियाली देशको प्रगति
एसियाली देशमध्ये जापानले पहिलो खेल हारिसकेको छ भने गएराति इरानले नाइजेरियासँग खेल्यो। खेलमा निर्धारित ९० मिनेटसम्म कुनै गोल हुन सकेन। यसपालिको विश्वकपकै पहिलो गोलरहित खेल र बराबरीमा टुङ्गिएको खेल पनि यही थियो।
अर्को एसियाली देश दक्षिण कोरियाले भोलि एकाबिहानै पौन ४ बजे रुससित पहिलो खेल खेल्दैछ। त्यसअघि बेल्जियम र अल्जेरियाको खेल पौने १० बजे र नेपालमा धेरै फ्यान रहेको ब्राजिल र मेक्सिकोबीचको खेल पौने १ बजे हुँदैछ।