खेलकुद, फिचर » लाखौं नेपालीले मन पराएको क्रिकेटलाई तहस नहस पार्ने भिलेनलाई चिनौं

काठमाण्डु, १५ वैशाख– अन्तर्राष्ट्रिय क्रिकेट काउन्सिल (आइसिसी)ले नेपाल क्रिकेट काउन्सिल (क्यान)लाई निलम्वनपछि नेपाली क्रिकेटका प्रशंसकहरु निराश छन् ।
क्यानमा गत मंसिरमा अधिवेशन भएको थियो । सो अधिवेशनमा चतुरबहादुर चन्द सर्वसम्मत अध्यक्षमा निर्वाचित भए । अधिवेशन नगराउन राष्ट्रिय खेलकुद परिषद्ले निर्देशन दिएको थियो । तर अन्तिम घडीको निर्देशनलाई वास्ता नगरी अधिवेशन सम्पन्न भयो । नयाँ कार्यसमिति निर्वाचित भयो ।

आफ्नो निर्देशनविपरीत अधिवेशन भएपछि राखेपका सदस्य सचिव केशव विष्ट आगो भए । उनले पुस महिनामा रमेश सिलवाललाई तदर्थ समितिको संयोजक बनाए । त्यो समिति पनि निर्वाचित समितिसँग कुनै सल्लाह बिना नै गठन भएको थियो । चन्द नेतृत्वको समितिलाई काउन्टर दिन र नयाँ अधिवेश गराउन गठन गरिएको तदर्थ समिति नै विवादको केन्द्र बनेर रह्यो । यो कामले क्रिकेट भित्र बलेको आगोमा विष्टले घीउ हालेको स्पष्ट भयो ।
क्रिकेटमा दुई दुई वटा कमिटी भएपछि काम कुन कमिटीले गर्ने ? भन्ने विवाद भयो । आइसिसीले यो विवादका कारण नेपाली क्रिकेटका केही प्रतियोगिता आफैले आयोजना गर्यो । जस्तो कि केही दिनअघि नामिबियाविरुद्धको विश्व लिग च्याम्पियनसिप ।
यो श्रृङखलामा जोडिने पात्रहरुमा चतुरबहादुर चन्द, रमेश सिलवाल, केशव विष्ट प्रमुख छन् । चन्द सर्वसम्मतले अध्यक्ष भएका हुन् । उनी विवादको कारक आफू होइन भन्ने ठान्छन् । रमेश सिलवाल चाहिँ केशव विष्टले चन्दलाई तह लगाउन प्रयोग गरेका बुख्याचा मात्रै हुन् । यसकारण उनी पनि विष्ट भन्दा कम जिम्मेवार हुन् । केशव विष्ट भने समन्वयकारी साझा संस्थाका अगुवा हुन् । तर उनले समन्वय गरेर मिलाएर लैजानु सट्टा पदाधिकारीहरुलाई एक आपसमा भिडाए । त्यो भिडन्तमा आफै सक्रिय सहभागी पनि भए ।
यही भिडन्तको परिणाम हो ‘क्यान निलम्वन’ ।
लंगुरको हातमा अंगुर
राखेपको नेतृत्व केशव विष्टलाई दिएलगत्तै विवाद उत्पन्न भएको थियो । दक्षिण कोरियाको इन्चोनमा भएको एसियन गेममा खेलाडी भगाएको आरोप विष्टलाई थियो । उनी राखेपले नै कारबाही गरेका कसूरदार थिए । विष्टले खेलाडी अमन पोडेलाई कोरियामा लुकाउन भूमिका खेलेको आरोप छ । तर यीनै विष्टलाई तत्कालीन खेलकुदमन्त्री पुरुषोत्तम पौडेलले सदस्य सचिवमा नियुक्त गरिदिए । त्यही विवादका कारण पौडेलले मन्त्रीपदबाट हात धुनु पर्यो ।
विवादै विवादका बीच नियुक्त भएका विष्टले केही गतिला काम गरेर आफ्ना पुराना धब्बा मेटाउने अपेक्षा पनि थियो । तर परिणाम निस्कियो अपेक्षाको ठीक विपरीत । विष्टले क्रिकेटलाई तहस नहस त पारे नै, नेपाली क्रिकेटको अन्तर्राष्ट्रिय शाख पनि धमिलो बनाए । नेपालमा क्रिकेटका लाखौ प्रशंसकहरुलाई पनि निराश बनाए । अहिले खेल क्षेत्रका जानकारहरुले राखेप विष्टको हातमा जानु लंगुरको हातमा अंगुर सरह भएको टिप्पणी गर्न थालेका छन् ।
(तस्बिरमा केशव विष्ट)
kathmandutoday