सशस्त्र बलका उच्च अधिकृतलाई गृहमन्त्रीको निर्देशन- 'चाकडी नगर्नुस्
काठमाडौं, चैत्र १२ - उपप्रधान तथा गृहमन्त्री बामदेव गौतमले चाकडी गरेर उच्च पदमा जाने आकांक्षा नपाल्न सशस्त्र बलका उच्च अधिकृतलाई निर्देशन दिएका छन् । उनले सधैं चेन अफ कमाण्डमा रहेर कार्य गर्न सुझाए ।
सशस्त्र प्रहरी बल प्रधान कार्यालयको बुधबार निरीक्षणपछि उपप्रधान तथा गृहमन्त्री गौतमले व्यक्तिको स्वाभिमानमा असर पार्ने गरी कसैले काम गर्न नहुनेतर्फ सचेत गराए । गौतमले संगठनमा सेवा प्रवेश गर्ने सवैले माथिल्लो पदमा जाने आकांक्षा राखेको हुने तर चाकडी गरेर अगाडि जानखोज्न नहुने उल्लेख गरे ।
'त्यो सिटमा एक जना मात्रै जाने हो, मतभिन्नता गर्नुहुँदैन, भिन्नता भएमा फौज छाडी दिनुपर्छ,' उपप्रधान तथा गृहमन्त्री गौतमले भने, 'कहिल्यै पनि मतभेद गर्नुहुँदैन, यसले फोर्स बिगार्छ ।'
संगठनभित्र आदेश दिन र मान्न कमजोरी हुन नहुने तथा मान्छे मन पर्यो वा परेन नभनि आदेशको पूर्णरुपमा पालना गर्नुपर्ने कुरा समेत उनले उल्लेख गरे । समस्या केही भएमा कमाण्डर मार्फत राख्न आग्रह गर्दै उनले समस्या सुन्न आफू तयार रहेको बताए ।
गृह सचिव जनार्दन नेपालले सशस्त्र प्रहरीले आफूलाई अब्बल दर्जाको फौजको रुपमा उभ्याउन सफल भएको बताए ।
सशस्त्र प्रहरी महानिरीक्षक कोषराज वन्तले उपलब्ध श्रोत साधनको अधिकतम उपयोग गरी उपलब्धी पूर्ण कार्यसम्पादन गर्न संगठन कृयाशिल रहेको बताए ।
- See more at: http://www.ekantipur.com