प्रधानमन्त्री कोइरालाले प्रचण्डलाई यसरी फकाए
प्रमुख प्रतिपक्ष दलका नेता समेत रहेका प्रचण्डलाई प्रधानमन्त्री कोइरालाले फकाउने शैलीमा कुरा गरेको बालुवाटार स्रोतले बताएको छ । मुलुकको पछिल्लो राजनीतिक अवस्था, संविधान निर्माणलगायत विषयमा कुराकानी भएको कोइरालाका प्रेस संयोजक प्रकाश अधिकारीले जानकारी दिए । विशेषगरी मुलुकको पछिल्लो राजनीतिक अवस्था र संविधानसभामा मनोनयन गरिने २६ जनाको विषयमा कुरा भएको थियो । सो अवसरमा संविधान निर्माण प्रक्रियालाई कसरी गति दिने र शान्ति प्रक्रियाका बाँकी रहेका काम पूरा गर्ने विषयमा कुरा भएको अधिकारीले बताए ।
शान्ति प्रक्रियाको साझेदार शक्ति हुनाको नाताले सबै विषयलाई सहमतिमा नै अगाडि बढाउनुपर्ने तथा जनअपेक्षाअनुसार संविधान निर्माण प्रक्रियालाई गति दिन सरकार र विपक्षी दल मिलेर जानुपर्ने विषय नै छलफलको प्रमुख विषय रहेको थियो ।
प्रधानमन्त्री कोइरालाले शनिबार नेकपा (माले), सद्भावना पार्टी र मधेसी जनअधिकार फोरम नेपाल (लोकतान्त्रिक)का शीर्ष नेतासँग संविधान निर्माण, न्याय परिषद्को सिफारिसमा देखिएको विवाद र २६ जनाको मनोनयनको विषयलाई लिएर छलफल गरेका थिए ।