नेपाली क्रिकेटरलाइ मासिक २० देखी ४० हजार तलब
१७ चैत,काठमाडौं। विश्वकप खेलेर फर्केको साता नबित्दै राष्ट्रिय क्रिकेटरहरूले अब सामान्य जागिरको चिन्ता लिनुनपर्ने भएको छ । प्रशिक्षक पुबुदु दसानायकेको प्रस्तावअनुसार क्रिकेट एसोसिएसन अफ नेपाल (क्यान) उनीहरूलाई मासिक २० देखि ४० हजार रुपैयाँ तलब दिन तयार भएको कान्तिपुर दैनिकमा खबर छ ।
प्रशिक्षक पुबुदुले बुधबार पारिवारिक बिदामा क्यानडा जानुअघि राष्ट्रिय खेलकुद परिषद् (राखेप) का सदस्यसचिव युवराज लामा, क्यान अध्यक्ष टंक आङबुहाङ र महासचिव अशोकनाथ प्याकुरेलसमक्ष खेलाडीलाई नियमित तलब दिनुपर्नेलगायत क्रिकेट विकासका दुईवर्षे कार्यक्रम प्रस्ताव गरेका थिए । 'त्यही प्रस्तावअनुसार खेलाडीलाई क्षमताअनुसार तीन समूहमा वर्गीकरण गरेर मासिक २० देखि ४० हजार रुपैयाँ तलब दिनेछौं,' आङबुहाङले भने, 'यति तलब भएपछि राम्रा खेलाडीले जागिरको चिन्ता लिनुपर्दैन ।'
पुबुदुले उत्कृष्ट ७ खेलाडीलाई 'ए', त्यसपछि अब्बल ७ लाई 'बी' र अन्य ४ खेलाडीलाई 'सी' मा समावेश गर्दै 'सेन्ट्रल कन्ट्रयाक' मा राख्न प्रस्ताव गरेका छन् । प्रस्तावअनुसार 'ए' मा पर्ने प्रत्येक खेलाडीलाई मासिक ४० हजार, 'बी' लाई ३० हजार र 'सी' लाई २० हजार रुपैयाँ तलब दिनुपर्छ । 'संसारमा देशको गौरव बढाउने खेलाडीलाई यति तलब धेरै ठूलो कुरा होइन । प्रायोजक खोजेर वा जसरी हुन्छ, हामी उपलब्ध गराउनेछौं,' आङबुहाङले भने ।
बंगलादेशबाट फर्केलगत्तै गुजाराकै चिन्तामा ऐतिहासिक क्रिकेटरहरू नेपाली सेनामा सिपाहीभन्दा तल्लो पद बन्दोबस्ती कार्य सिपाही (बकासी) का लागि आवेदन दिन पुगेका थिए । क्यानले नियमित तलबै दिने तयारी सुरु गरेपछि उनीहरूमा उत्साह छाएको छ । 'सेन्ट्रल कन्ट्रयाक्टको व्यवस्था भयो भने एकदमै राम्रो हुनेछ । कार्यान्वयन नै मुख्य कुरा हो । त्यसैले तलबका लागि निश्चित कोष वा प्रायोजकको व्यवस्था बेलैमा गर्नुपर्छ । अनि खेलेरै बाँच्न सक्ने आधार पनि तयार हुन्छ,' राष्ट्रिय टिमका उपकप्तान ज्ञानेन्द्र मल्लले भने ।