आजको फोटो, फिचर » प्रतिगामी संविधान ल्याउन नदिनु हाम्रो जित : प्रचण्ड

अन्नपूर्ण |


काठमाडौं : एमाओवादीका अध्यक्ष पुष्पकमल दाहाल प्रचण्डले संविधानसभाबाट कांग्रेस र एमालेलाई प्रतिगामी संविधान बनाउन नदिन आफूहरु सफल भएको बताएका छन् ।

बिहीबार राति बसेको संविधानसभाको बैठकमा अवरोध गरेर फर्कने क्रममा बोल्दै अध्यक्ष प्रचण्डले जनताका अधिकार रक्षाका लागि भएको सम्झौताबाट पछि हटेर संविधान ल्याउने कांग्रेस–एमालेको प्रयास असफल पारिएको दाबी गरे ।

‘यथास्थितिवादी र प्रतिक्रियावादी संविधान बन्न नदिनु हाम्रो प्रमुख उद्धेश्य थियो । दुबै दलले बहुमतको दम्भ देखाउने कोशिस गरेका थिए’, अध्यक्ष प्रचण्डले भने, ‘हिजोकै सम्झौताअनुसारको संविधन बनाउने हाम्रो कोशिस छ । माओवादीले संविधान तुहायो भन्ने कुरा बिल्कुल निराधार हो ।’

कांग्रेस–एमालेको बहुमतको दम्भ र अहंकारले सहमतीय संविधान आउन नसकेको बताउँदै प्रचण्डले राजनीतिक दलहरु प्रतिवद्धताबाट पछि नहटे अझै पनि सहमतीय संविधान आउन सक्ने बताए ।

जनतासँग एक वर्षमा संविधान दिने गरी गरेको बाचा पूरा गर्न नसकेकोमा माफी माग्दै अध्यक्ष प्रचण्डले त्यसको प्रमुख दोषी सत्तारुढ दल नै रहेको आरोप लगाए ।